དབྱི་སི་རལ་གྱིས་ལེ་པ་ནོན་གྱི་ཤར་རྒྱུད་དུ་མཁའ་འཇབ་རྒོལ་བྱས་ནས་མི20རྐྱེན་ལམ་དུ་བཏང་།

ཚེས9ཉིན། ལེ་པ་ནོན་གྱི་སྤྱི་པའི་འཕྲོད་བསྟེན་པུའུ་ཡིས་བརྡ་ཁྱབ་སྤེལ་ནས་བཤད་རྒྱུར། དབྱི་སི་རལ་གྱིས་ཉིན་དེར་ལེ་པ་ནོན་ཤར་རྒྱུད་ཀྱི་པ་ལི་པེ་ཁི-ཞི་ཨར་མུས་ལེ་ཞིང་ཆེན་གྱི་ས་ཆ་མང་པོར་མཁའ་རྒོལ་བྱས་ནས་ཉུང་མཐར་ཡང་མི20རྐྱེན་ལམ་དུ་བཏང་ཡོད་ཟེར།

ལེ་པ་ནོན་རྒྱ་གྲམ་དམར་པོ་ཚོགས་པས་བསྟན་དོན། རོགས་སྐྱོབ་མི་སྣས་ཁང་པའི་རྫ་ལྷེབ་ཆག་རོ་སོགས་ཞིག་རོའི་འོག་ཏུ་མི་སྣ་མྱུར་སྐྱོབ་བྱེད་བཞིན་ཡོད་ཟེར།

ཚེས9ཉིན། ལེ་པ་ནོན་གྱི་སྤྱི་པའི་འཕྲོད་བསྟེན་པུའུ་ཡི་བརྡ་ཁྱབ་གཞན་ཞིག་གི་ནང་དུ། ཚེས8ཉིན་དབྱི་སི་རལ་གྱིས་ལེ་པ་ནོན་གྱི་ལྷོ་རྒྱུད་ཀྱི་གྲོང་ཁྱེར་ཐེ་འར་ལ་མཁའ་རྒོལ་བྱས་ཏེ་ཉུང་མཐར་ཡང་མི8རྐྱེན་ལམ་དུ་བཏང་བའི་ཁྲོད་སྨན་བཅོས་མི་སྣ7ཡོད་ཅེས་བཀོད་ཡོད་པ་དང་། ལེ་པ་ནོན་གྱི་སྤྱི་པའི་འཕྲོད་བསྟེན་པུའུ་ཡིས་དབྱི་སི་རལ་གྱིས་སྨན་བཅོས་མི་སྣར་མུ་མཐུད་དུ་ཕར་རྒོལ་བྱས་པར་རྒོལ་གཏམ་བཏང་ནས། དེ་ལ་རྒྱུན་ཆད་མེད་པར་དམག་འཁྲུག་བརྒྱབ་པའི་ནག་ཉེས་རབ་དང་རིམ་པ་ཡོད་ཅེས་བརྗོད།

ལེ་པ་ནོན་དམག་ཕྱོགས་ཀྱི་ཆ་འཕྲིན་མི་སྣས་ཞིན་ཧྭ་གསར་འགྱུར་ཁང་གི་གསར་འགོད་པར་བཤད་རྒྱུར། དབྱི་སི་རལ་གྱི་དམག་འཐབ་གནམ་གྲུ་གཉིས་ཀྱིས་ཚེས8ཉིན་ཐེ་འར་གྲོང་ཁྱེར་ལྟེ་གནས་ཀྱི་ཁང་པར་འཕུར་མདེལ8འཕངས་ནས་རྩ་གཏོར་བཏང་བར་མ་ཟད། རྒྱུ་རྐྱེན་དེའི་དབང་གིས་མེ་སྐྱོན་བྱུང་ནས་ཉེ་འགྲམ་གྱི་ལས་ཤག་ལའང་གཏོར་སྐྱོན་ཐེབས་ཡོད་ཟེར།

ཚེས9ཉིན། ལེ་པ་ནོན་གྱི་སྤྱི་པའི་འཕྲོད་བསྟེན་པུའུ་ཡིས་ཁྱབ་བསྒྲགས་བྱས་པའི་བསྡོམས་རྩིས་གཞི་གྲངས་ལྟར་ན། ན་ནིང་ཟླ10པའི་ཟླ་སྟོད་ནས་བཟུང་ལེ་པ་ནོན་གྱི་ཀྲིན་ཀྲུའུ་ཏང་དང་དབྱི་སི་རལ་བར་བྱུང་བའི་གདོང་ཐུག་དེའི་དབང་གིས་ལེ་པ་ནོན་དུ་མི3136རྐྱེན་ལམ་དུ་ཤོར་ཡོད་པ་རེད།