ཨབ་ཀྲ་པེའི་རྒྱལ་སྤྱིའི་རྡོ་སྣུམ་དངོས་མང་བཤམ་སྟོན་ཚོགས་འདུས་ཀྲུང་གོའི་ཁེ་ལས་བརྒྱ་ལྷག་ཙམ་གྱི་ཡིད་དབང་བཀུག

ཚེས4ཉིན།   2024ལོའི་ཨབ་ཀྲ་པེ་རྒྱལ་སྤྱིའི་རྡོ་སྣུམ་དངོས་མང་བཤམ་སྟོན་ཚོགས་འདུ་དེ་ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་རྒྱལ་ས་ཨབ་ཀྲ་པེ་རྒྱལ་ཁབ་འགྲེམས་སྟོན་ལྟེ་གནས་སུ་ཚོགས་འགོ་བརྩམས་ཤིང་། མི་ཐབས་རིག་ནུས（AI）དང་རྒྱུན་མཐུད་ནུས་རྒྱུ་གཞན་སྒྱུར་བརྗོད་དོན་གཙོ་བོར་བྱས་པས་ཀྲུང་གོའི་ཁེ་ལས་བརྒྱ་ལྷག་ཙམ་འགྲེམས་སྟོན་ནང་ཞུགས་རྒྱུའི་ཡིད་དབང་བཀུག་ཡོད་པ་རེད།

ཨ་རབ་མཉམ་འབྲེལ་ཚོ་དཔོན་རྒྱལ་ཁབ་ཀྱི་བཟོ་ལས་དང་སྔོན་ཐོན་ལག་རྩལ་པུའུ་ཡི་པུའུ་ཀྲང་སུའུ་ཏན·ཅ་པིས་འར་གྱིས་འགོ་རྩོམ་མཛད་སྒོའི་སྟེང་ཤིས་ཚིག་ཕུལ་སྐབས། མི་ཐབས་རིག་ནུས་ཀྱི་འཕོ་འགྱུར་སྟོབས་ཤུགས་ནན་བཤད་བྱས་ནས་དེར“མཚན་ཉིད་དུས་རབས་ཀྱི་གསར་གཏོད”ཅེས་བརྗོད་པ་དེས་ཐོན་སྐྱེད་ནུས་ཤུགས་ཆེ་རུ་འགྲོ་བར་སྐུལ་འདེད་ཐེབས་པ་དང་།  ནུས་རྒྱུ་ཕྱོགས་སྒྱུར་གྱི་འཕེལ་རིམ་ཇེ་མགྱོགས་སུ་སོང་ཡོད་པ་རེད། སྐབས་འདིའི་དངོས་མང་བཤམ་སྟོན་ཚོགས་འདུའི་སྟེང“AIཆེད་ཁུལ”དམིགས་སུ་བཀོད་སྒྲིག་བྱས་ཡོད་པ་དང་།  དེའི་ནང་ཝུའེ་རོན་དང་བཅས་པའི་ཚན་རྩལ་ཀུང་སི་བསྡུ་རུབ་བྱས་ནས་རྒྱུན་སྲིང་ཐུབ་པའི་ནུས་རྒྱུའི་ཐག་གཅོད་ཇུས་གཞི་འགྲེམས་སྟོན་བྱ་རྒྱུ་ཡིན་ཞེས་ནན་གྱིས་བསྟན།

ཀྲུང་གོའི་རྡོ་སྣུམ་རང་བྱུང་སོལ་རླངས་ཚོགས་པ་དང་། ཀྲུང་གོའི་རྒྱ་མཚོ་རྡོ་སྣུམ་ཚོགས་པ། ཧྲན་ཏུང་རྒྱ་མཚོ་ཚོགས་པ་བཅས་པའི་ཀྲུང་གོའི་ཁེ་ལས་བརྒྱ་ལྷག་ཙམ་གྱིས་སྐབས་འདིའི་དངོས་མང་བཤམ་སྟོན་ཚོགས་འདུའི་སྟེང་གཞི་གྲངས་ཅན་དང་། ཐཱན་ཉུང་ཅན། སླར་སྐྱེས་ནུས་རྒྱུ་བཅས་ཐད་ཀྱི་ལག་རྩལ་གྲུབ་འབྲས་གསར་ཤོས་འགྲེམས་སྟོན་བྱས་པ་དེས་གོ་ལ་ཧྲིལ་པོའི་ནུས་རྒྱུ་ལས་རིགས་ཀྱི་ནུས་རྒྱུ་གཞན་སྒྱུར་ཐད་ཀྱི་འཕེལ་རྒྱས་འགྲོ་སྟངས་མངོན་ཡོད་པ་རེད། སྐབས་འདིའི་དངོས་མང་བཤམ་སྟོན་ཚོགས་འདུའིུ་སྟེང་ད་དུང་ཐཱན་ཉུང་ཅན་དང་གཞི་གྲངས་ཅན། ནུས་རྒྱུ་གཙང་མའི་རྣམ་གྲངས་ཀྱི་མ་དངུལ་གྲབས་གསོག་བྱེད་པ་སོགས་གཙོར་བཟུང་ནས་ གྲོས་བསྡུར་བྱ་རྒྱུ་རེད།

སྐབས་འདིའི་དངོས་མང་བཤམ་སྟོན་ཚོགས་འདུ་དེ་ཟླ11པའི་ཚེས7ཉིན་བར་མུ་མཐུད་དུ་ཚོགས་རྒྱུ་རེད།