འཇར་པན་གྱིས་ཟླ11པའི་ཚེས11ཉིན་དབུ་བཞུགས་བློན་ཆེན་གྱི་མིང་འདོན་འདེམས་བསྐོ་བྱ་རྒྱུ་རེད།

ཚེས5ཉིན།  འཇར་པན་གྱི་ནང་བློན་ཁང་གི་འགོ་འཛིན་ལིན་ཧྥང་ཀྲིན་གྱིས་གྲོས་ཁང་འོག་མའི་གྲོས་མོལ་ཚོགས་འདུའི་སྟེང་ཚེས11ཉིན་དམིགས་བསལ་རྒྱལ་ཚོགས་བསྡུས་ནས་དབུ་བཞུགས་བློན་ཆེན་གྱི་མིང་འདོན་འདེམས་བསྐོ་བྱ་རྒྱུ་ཁྱབ་བསྒྲགས་བྱས།

ལིན་ཧྥང་ཀྲིན་གྱིས་ཉིན་དེར་གྲོས་ཁང་འོག་མའི་སྲིད་སྐྱོང་ཏང་དང་སྲིད་དབང་བཟུང་མེད་པའི་ཏང་གི་ཚོགས་པ་སོ་སོའི་ཕྱོགས་ཁག་གི་འཐུས་མིའི་གྲོས་མོལ་ཚོགས་འདུར་ཞུགས་སྐབས། གྲོས་ཁང་འོག་མའི་འདེམས་བསྐོའི་གྲུབ་འབྲས་ལ་གཞིགས་ཏེ་ཚེས11ཉིན་དམིགས་བསལ་རྒྱལ་ཚོགས་བསྡུས་ནས་དབུ་བཞུགས་བློན་ཆེན་གྱི་མིང་འདོན་འདེམས་བསྐོ་བྱ་རྒྱུ་ཁྱབ་བསྒྲགས་བྱས་པ་རེད། སྲིད་འཛིན་ཏང་ཕྱོགས་ཀྱིས་ཐེངས་འདིའི་ཚོགས་ཡུན་ཉིན4ལ་གཏན་འཁེལ་བྱས་ནས་ཚེས14ཉིན་མཇུག་བསྒྲིལ་རྒྱུའི་གྲོས་འགོ་བཏོན།

འཇར་པན་གྱི་རྩ་ཁྲིམས་ནང་གྲོས་ཁང་འོག་མས་འདེམས་བསྐོ་བྱས་རྗེས་ཀྱི་ཉིན་30ནང་དུ་ངེས་པར་དུ་དམིགས་བསལ་རྒྱལ་ཚོགས་བསྡུ་དགོས་པ་གཏན་འཁེལ་བྱས་ཡོད་པ་རེད། སྐབས་དེར་ད་ལྟའི་དབུ་བཞུགས་བློན་ཆེན་ཧྲི་ཕའོ་ནང་བློན་ཁང་གིས་མཉམ་དུ་ལས་གནས་དགོངས་ཞུ་བྱ་རྒྱུ་དང་གསར་དུ་བདམས་ཐོན་བྱུང་བའི་གྲོས་མིས་གྲུབ་པའི་གྲོས་ཁང་འོག་མ་དང་གྲོས་ཁང་གོང་མས་སྐབས་རྗེས་མའི་དབུ་བཞུགས་བློན་ཆེན་གྱི་མིང་འདོན་བྱ་རྒྱུ་རེད།

འཇར་པན་སྨྱན་སྦྱོར་གྱིས་སྤེལ་བའི་གནས་ཚུལ་ལྟར་ན།  རང་དབང་དམངས་གཙོ་ཏང་དང་ཀུང་མེན་ཏང་ལས་གྲུབ་པའི་སྲིད་འཛིན་མནའ་འབྲེལ་ལ་ཐེངས་འདིའི་གྲོས་ཁང་འོག་མའི་འདེམས་བསྐོའི་ཁྲོད་གདན་ཐོབ་ཕྱེད་ཀ་ལྷག་ཙམ་ཐོབ་མེད་པས་དབུ་བཞུགས་བློན་ཆེན་གྱི་མིང་འདོན་འདེམས་བསྐོ་དེ་སྐོར་ཐེངས་དང་པོའི་འདེམས་ཤོག་འཕེན་པའི་ཁྲོད་ཐད་ཀར་རྒྱལ་ཕམ་ཐག་གཅོད་ཐུབ་ཡོད་པ་རེད། སྐབས་དེར་ད་ལྟའི་དབུ་བཞུགས་བློན་ཆེན་ཧྲི་ཕའོ་མའོ་དང་སྲིད་དབང་བཟུང་མེད་པའི་ཏང་ཆེ་ཤོས་ཁྲིམས་འཛུགས་དམངས་གཙོ་ཏང་གི་འགོ་གཙོ་ཡེ་ཐེན་ཅ་ཡན་སྐོར་ཐེངས་གཉིས་པར་འདེམས་ཤོག་འཕེན་རྒྱུ་དང་།འདེམས་ཤོག་མང་ཤོས་ཐོབ་མཁན་དབུ་བཞུགས་བློན་ཆེན་གསར་པར་འགྱུར་རྒྱུ་རེད།