ལི་ཆང་གིས་རྒྱལ་སྤྱིའི་དངུལ་ལོར་ཐེབས་རྩའི་རྩ་འཛུགས་ཀྱི་སྤྱི་ཁྱབ་ཀི་ཨའོ་ཨར་ཅི་ཡེ་ཝ་ལ་ཐུག་འཕྲད་གནང་བ།

རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་ཟླ3པའི་ཚེས25ཉིན་གྱི་སྔ་དྲོར་མི་དམངས་ཚོགས་ཁང་ཆེན་མོ་ནས་རྒྱལ་སྤྱིའི་དངུལ་ལོར་ཐེབས་རྩའི་རྩ་འཛུགས་ཀྱི་སྤྱི་ཁྱབ་ཀི་ཨའོ་ཨར་ཅི་ཡེ་ཝ་ལ་ཐུག་འཕྲད་གནང་།

ཟླ3པའི་ཚེས25ཉིན་གྱི་སྔ་དྲོར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལི་ཆང་གིས་པེ་ཅིན་མི་དམངས་ཚོགས་ཁང་ཆེན་མོ་ནས་རྒྱལ་སྤྱིའི་དངུལ་ལོར་ཐེབས་རྩའི་རྩ་འཛུགས་ཀྱི་སྤྱི་ཁྱབ་ཀི་ཨའོ་ཨར་ཅི་ཡེ་ཝ་ལ་ཐུག་འཕྲད་གནང་།

ལི་ཆང་གིས་བསྟན་དོན། མིག་སྔའི་འཛམ་གླིང་དཔལ་འབྱོར་སླར་གསོ་བྱུང་བ་ཅུང་དལ་བ་དང་། ཀྲུང་གོས་ད་ལོར་རྒྱལ་ནང་གི་ཐོན་སྐྱེད་སྤྱི་འབོར5%ཡས་མས་འཕར་བའི་དམིགས་འབེན་བཏོན་པ་དེ་འཛམ་གླིང་གི་དཔལ་འབྱོར་ལ་ཕན་ཁེ་ལེགས་པོ་ཡོད། ད་ལོའི་ཚུན་ནས་བཟུང་། ཀྲུང་གོའི་དཔལ་འབྱོར་སླར་གསོ་དང་ཇེ་ལེགས་སུ་འགྲོ་བའི་རྣམ་པ་མུ་མཐུད་དུ་སྲ་བརྟན་དང་ཇེ་ཆེར་སོང་ནས་མགོ་ལེགས་པོ་བརྩམས་ལ། ལོ་ཧྲིལ་བོའི་དཔལ་འབྱོར་སྤྱི་ཚོགགས་འཕེལ་རྒྱས་དམིགས་འབེན་ལེགས་འགྲུབ་བྱེད་པར་རྨང་གཞི་བརྟན་པོ་བཏིངས། རྒྱང་རིང་ལ་བལྟས་ན། ཀྲུང་གོའི་དཔལ་འབྱོར་ལ་ལམ་ལུགས་དང་ཚོང་ར། ཐོན་ལས། མི་ཤུགས་ཐོན་ཁུངས་དང་གསར་སྐྲུན་གྱི་ལེགས་ཆ་ལྡན་ཞིང་། དུས་ཡུན་རིང་པོར་ཇེ་ལེགས་སུ་འགྲོ་བའི་གཞི་རྩའི་རྣམ་པར་འགྱུར་ལྡོག་བྱུང་མེད་ལ་འབྱུང་ཡང་མི་སྲིད། ང་ཚོར་ཀྲུང་གོའི་དཔལ་འབྱོར་རྒྱུན་མཐུད་དང་བདེ་ཐང་ངང་འཕེལ་རྒྱས་རྒྱུན་འཁྱོངས་བྱེད་པར་ཡིད་ཆེས་ཡོད་ལ་ནུས་པའང་ཡོད། ཀྲུང་གོས་བློ་བརྟན་འགྱུར་མེད་ངང་ཆུ་ཚད་མཐོ་བའི་ཕྱི་ཕྱོགས་སྒོ་འབྱེད་ལ་སྐུལ་འདེད་བཏང་ནས་སྔར་ལས་ལྷག་པར་ཕྱོགས་སོ་སོའི་གཉིས་ཕན་མཉམ་རྒྱལ་ལ་སྐུལ་འདེད་གཏོང་རྒྱུ་ཡིན།

ལི་ཆང་གིས་བསྟན་དོན། ཀྲུང་གོ་དང་ཐེབས་རྩའི་རྩ་འཛུགས་ཀྱིས་མཉམ་ལས་འབྲེལ་བ་ལེགས་པོ་རྒྱུན་འཁྱོངས་བྱས་ཡོད། ཀྲུང་གོས་ཐེབས་རྩ་ཚོགས་པས་འཛམ་གླིང་བཅོས་སྐྱོང་ཁྲོད་མུ་མཐུད་དུ་བྱས་རྗེས་གལ་ཆེན་འཇོག་རྒྱུར་རྒྱབ་སྐྱོར་བྱས་ནས། སྔར་ལས་ལྷག་པར་ཐེབས་རྩ་ཚོགས་པའི་མཉམ་ལས་གཏིང་ཟབ་དུ་བཏང་སྟེ། མུ་མཐུད་དུ་འཛམ་གླིང་བུ་ལོན་བཅོས་སྐྱོང་མ་ལག་འཐུས་ཚང་དུ་གཏོང་བར་སྐུལ་འདེད་གཏོང་བ་དང་། འཛམ་གླིང་དཔལ་འབྱོར་སླར་གསོར་སྐུལ་འདེད་གཏོང་བར་སྟོབས་ཤུགས་ལེགས་སྐྱེས་སུ་འབུལ་འདོད་ཡོད། ཐེབས་རྩ་ཚོགས་པས་མུ་མཐུད་དུ་དགེ་མཚན་ལྡན་པའི་ཤུགས་རྐྱེན་འདོན་སྤེལ་བྱས་ནས། དཔལ་འབྱོར་འཛམ་གླིང་ཅན་དང་རང་དབང་ཉོ་ཚོང་ལ་སྲུང་སྐྱོང་བྱེད་པར་སྐུལ་འདེད་བཏང་ནས། འཛམ་གླིང་ཐོན་ལས་ཕྲེང་སྦྲེལ་དང་མཁོ་སྤྲོད་ཕྲེང་སྦྲེལ་གཏན་འཇགས་ཤར་གཏོང་ལ་སྲུང་སྐྱོབ་དང་སྒོ་འབྱེད་ཅན་གྱི་འཛམ་གླིང་དཔལ་འབྱོར་འཛུགས་སྐྲུན་ལ་སྐུལ་འདེད་གཏོང་འདོད་ཡོད།

ཝུའུ་ཀྲིན་ལུང་ཐུག་འཕྲད་ལ་ཞུགས།