ལོ་ངོ8000ཡར་སྔོན་གྱི་ལོ་ལེགས་དགའ་སྟོན་མཚོན་པའི་དངོས་རིགས་ལ་ལྟ་བ། ཕེ་ལི་ཀང་ནི་ཧོ་ནན་ཞིན་ཀྲིན་གྲོང་ཁྱེར་ནུབ་བྱང་རྒྱུད་དུ་ཆགས་པའི་སྤྱིར་བཏང་གི་གྲོང་ཚོ་ཞིག་ཡིན་ལ། ཕྱིའི་རྣམ་པ་ནི་སྤྱིར་བཏང་གི་གྲོང་ཚོ་གཞན་དག་དང་ཁྱད་པར་གང་ཡང་མེད་མོད། འོན་ཀྱང་གྲོང་ཚོ་དེའི་ས་འོག་ཏུ་ལོ་ངོ་ཁྲི་ལ་ཉེ་བའི་ཡར་སྔོན་གྱི་ཀྲུང་ཧྭ་མི་རིགས་ཀྱི་ཞིང་ལས་དཔལ་ཡོན་གྱི་གསང་བ་མང་དག་ཅིག་སྦས་ནས་ཡོད་ཅིང་། དེས་རང་རྒྱལ་གྱི་ཞིང་ལས་ལོ་རྒྱུས་དེ་ལོ་ངོ8000གི་ཡར་སྔོན་དུ་ཁུངས་དེད་ཆོག་པའི་རིན་ཐང་ཅན་གྱི་བདེན་སྤང་འདོན་སྤྲོད་བྱས་ཡོད།

ཕྱི་ངོས་ཡོངས་བརྡར་ཟད་སོང་ཞིང་གཞུ་དབྱིབས་སུ་མངོན་པ་དང་། ཕྱི་ལྟག་ཅུང་ཟད་མཐུག་ལ་རིམ་བཞིན་ཇེ་སྲབ་ཡིན་པའི་སོག་ལེའི་ཁ་ལྟ་བུའི་རྡོ་བཟོས་ཟོར་བ་འདི་ད་ལྟའི་བར་ལོ་ངོ8000ཡས་མས་སོང་བ་དང་། མིག་སྔའི་བར་རྒྱལ་ནང་ནས་གསར་རྙེད་བྱུང་བའི་སོག་ལེའི་ཁ་ཅན་གྱི་རྡོ་བཟོས་ཟོར་བ་ཐོག་མ་དེ་ཡིན་པ་དང་། ཀྲུང་ཧྭའི་ཟོར་བ་དང་པོའི་མཚན་སྙན་ལྡན་པའི་ཟོར་བ་འདི་བཞིན་ཕེ་ལི་ཀང་གནའ་ཤུལ་ནས་ཐོན་པ་ཞིག་རེད། 

རྡོ་བཟོས་སྡེར་གཞུང་ནི་རྡོ་ལེབ་ཅིག་བརྡར་ནས་གྲུབ་པ་དང་། ཞིན་ཀྲིན་གྲོང་ཁྱེར་དངོས་མང་བཤམས་སྟོན་ཁང་གི་འགན་འཁུར་བ་ཏུའུ་ཕིན་ཨན་གྱིས་ངོ་སྤྲོད་བྱས་པར། ཕྱེ་བརྡལ་གྱི་མཐིལ་ན་ཀ་ཟླུམ་དབྱིབས་ཀྱི་རྐང་པ་ཐུང་ཐུང་བཞིན་ཡོད་པ་དང་། རྡོ་ལེབ་མཐུག་པོ་བརྡར་ནས་བཟོས་པས་ལས་སྣོན་གྱི་དཀའ་ཚད་མཐོ་ལ། རྡོ་བཟོས་སྡེར་གཞུང་དང་རྡོ་བཟོས་དབྱིག་དུམ་ནི་མཉམ་དུ་སྤྱོད་ཀྱི་ཡོད་པ་རེད། འདི་ནི་ཀྲུང་གོའི་ཆེས་སྔ་བའི་ལོ་ཏོག་གི་ཕྱི་ཤུན་ཤུ་བའི་སྤྱོད་ཆས་ཤིག་ཡིན་པ་རེད།

འདི་ནི་རྫ་བུམ་ཞིག་ཡིན་པ་དང་། ཆང་རྫ་ཞིག་རེད་ཅེས་བརྗོད་ཀྱང་ཆོག ཀྲུང་གོའི་སྤྱི་ཚོགས་ཚན་རིག་ཁང་གནའ་རྫས་ཞིབ་འཇུག་ཁང་གི་ཞིབ་འཇུག་པ་གཞོན་པ་ལི་ཡོན་ཆང་གིས་ངོ་སྤྲོད་བྱས་པར་གཞིགས་ན། ལོ་ངོ8000གི་ཡར་སྔོན་དུ་ཕེ་ལི་ཀང་བ་ཚོས་ཆང་བསྙལ་ཤེས་ཀྱིན་ཡོད་པ་མཚོན་ཡོད།

ཕག་པར་སྐྱེ་འཕེལ་མགྱོགས་པའི་ཁྱད་ཆོས་ལྡན་པས། གནས་གཏན་ཁེལ་དུ་བསྡད་ནས་ཞིང་ལས་གཉེར་མཁན་གྱི་མི་རྣམས་ལ་མཚོན་ནས་བཤད་ན་དེ་ནི་ཁྱིམ་དུ་གསོ་ཉར་བྱེད་པར་འཚམ་པའི་སྒོ་ཕྱུགས་ཡག་པོ་ཞིག་ཡིན་པ་དང་། རྫ་མས་བཟོས་པའི་ཕག་མགོ་འདི་ནི་ཕེ་ལི་ཀང་གནའ་ཤུལ་དུ་ཉར་ཚགས་བྱས་པའི་རིགས་འདིའི་དངོས་རྫས་གཅིག་པུ་ཡིན། ཏུའུ་ཕིན་ཨན་གྱིས་ངོ་སྤྲོད་བྱས་པར་གཞིགས་ན། རྫ་བཟོས་ཕག་མགོ་འདི་ལས་སྐབས་དེར་ཕག་པ་ཁྱིམ་ཕྱུགས་སུ་གསོ་བཞིན་པ་མཚོན་པ་མ་ཟད། སྒྱུ་རྩལ་གྱི་ཐོན་རྫས་ལ་དོ་སྣང་བྱེད་པའི་རྣམ་པ་ཡང་མཚོན་ཡོད།

ཕེ་ལི་ཀང་གནའ་ཤུལ་དུ་ནོར་བུ་འདི་དག་གིས་ག་ལ་ཚད་དེ། ཞིན་ཀྲིན་གྲོང་ཁྱེར་དངོས་མང་བཤམས་སྟོན་ཁང་དུ་རྡོ་བཟོས་སྟ་རེ་དང་ཁེམ། ཟོར་བ། སྡེར་གཞུང་སོགས་ཞིང་ལས་ཐོན་སྐྱེད་ཡོ་བྱད་ཉར་ཚགས་བྱས་པ་ཆ་ཚང་ཞིང་། རྫ་བུམ་དང་རྫ་དེམ་སོགས་བཟའ་བཏུང་ཡོ་བྱད་ཀྱི་རིགས་སྣ་འཛོམས་ལས་སྐབས་དེ་དུས་ཀྱི་མེས་པོ་ཚོས་གདོད་མའི་རྨོ་འདེབས་ཀྱི་རྣམ་པ་དང་ཁ་གྱེས་ནས་འཇོར་གྱིས་རྨོ་འདེབས་བྱེད་པའི་ཞིང་ལས་དུས་སྐབས་སུ་སླེབས་པ་བདེན་དཔང་བྱས་ཡོད།

ད་སྐབས། ལོ་ངོ8000ཡར་སྔོན་གྱི་ཞིང་ལས་ཀྱི་རྣམ་པ་འཁྲུག་པོ་འདིས་མེས་པོ་ཚོས་རྡོ་བཟོས་ཁེམ་གྱིས་ས་སློག་པ་དང་ལོ་ལེགས་བྱུང་བའི་སྐབས་སུ་རྡོ་བཟོས་ཟོར་བས་བཙས་མ་རྔ་བ། རྔ་བསྡུ་ཟིན་པའི་འབྲུ་རིགས་དག་རྡོ་བཟོས་སྡེར་གཞུང་དང་རྡོ་བཟོས་དབྱིག་དུམ་སྤྱད་ནས་ཕྱི་ཤུན་ཤུ་བ་དང་། ཟས་མ་ཚར་བའི་འབྲུ་རིགས་དག་ཆང་བསྙལ་བ་སོགས་རྣམ་པ་ཡོངས་ང་ཚོས་གསལ་པོར་རྟོགས་ཐུབ།

ལོ་ངོ་ཁྲི་ཡི་འཕེལ་འགྱུར་རིང་མོའི་ཁྲོད་ཞིང་ལས་ཐོན་སྐྱེད་དང་འཚོ་བའི་རྣམ་པར་གནམ་ས་བླ་འོག་བརྗེ་བ་ལྟ་བུའི་འགྱུར་ལྡོག་བྱུང་མོད། འོན་ཀྱང་ཀྲུང་གོའི་ཞིང་པས་ལོ་ལེགས་ལ་བཅངས་པའི་རེ་སྨོན་ནི་ནམ་ཡང་འགྱུར་མ་མྱོང་སྟེ། ཞིང་སར་བཅངས་པའི་བརྩེ་བ་དང་ལོ་ལེགས་འབྱུང་བའི་རེ་སྒུག ས་གཞི་ཆེན་པོ་འདི་རུ་མི་རབས་ནས་མི་རབས་བར་རྒྱུད་སྐྱོང་མུས་སུ་ཡོད།