ལུའུ་ཐུའུ་ཚགས་པར་ཁང་གིས་གནས་ཚུལ་སྤེལ་བ་ལྟར་ན།  གཟའ་འཁོར་གོང་མའི་གཟའ་ལྷག་པ་སྟེ། སྤྱི་ཟླ9ཚེས13ཉིན་ཉི་ཕཱ་ནད་དུག་འགོས་ཁྱབ་འགྲོ་བ་འགོག་ཆེད་རྒྱ་གར་ལྷོ་རྒྱུད་ཀྱི་ཁ་ལ་ལ་མངའ་སྡེ་ཡིས་སློབ་གྲྭ་ཁག་ཅིག་དང་གཞུང་ལས་ཁང་། སྤྱི་སྤྱོད་འགྲིམ་འགྲུལ་བཅས་འཁོར་སྐྱོད་བྱེད་མཚམས་བཞག་པ་ཁྱབ་བསྒྲགས་བྱས་པ་རེད། འཛམ་གླིང་གི་རིམས་འགོག་སྨན་ཁབ་མནའ་འབྲེལ་（Gavi）གྱི་གཞུང་ཕྱོགས་དྲ་ཚིགས་སྟེང་བཀོད་པའི་རྩོམ་ཡིག་ཅིག་ནང་། ཏོག་གསར་རིམས་ནད་རྗེས་སུ་རྒྱ་གར་དུ་ཐོན་པའི་ད་ཐེངས་ཀྱི་རིམས་ནད་དེས་ཐེངས་རྗེས་མའི་འགོས་ཁྱབ་ཆེ་བའི་རིམས་ནད་ཐོན་རྒྱུར་ཉེན་བརྡ་བཏང་བའི་ངོས་འཛིན་བྱས་ཡོད།  

ཁྱིམ་མཚེས་རྒྱལ་ཁབ་ཏུ་ཐོན་པའི་རིམས་འདིས་རང་རྒྱལ་ལ་ཤུགས་རྐྱེན་གང་འདྲ་བཟོ་སྲིད་པ་དང་།  ཉི་ཕཱ་ནད་དུག་ལས་རེས་བསྐོར་གསར་པའི་འཛམ་གླིང་གི་འགོས་ཁྱབ་ཆེ་བའི་རིམས་ནད་ཡམས་ཐོན་་སྲིད་དམ།   ཆིན་ཧྭ་སློབ་ཆེན་གསོ་རིག་སློབ་གླིང་གི་འགོ་འཛིན། འཛམ་གླིང་བདེ་ཐང་སྨན་རྫས་གསར་སྤེལ་ལྟེ་གནས་ཀྱི་ཀྲུའུ་རེན་ཏིན་ཧྲིན་གྱིས། ཉི་ཕཱ་ནད་དུག་གིས་སྲོག་ལ་ཉེན་ཁ་བཟོ་ཚད་ཅུང་མཐོ་རུང་།  འགོས་ཁྱབ་རང་བཞིན་ཅུང་དམའ་བ་དང་།   དེའི་ཐོག་དེའི་གོང་ནད་དུག་ཐོན་རུང་འགོས་ཁྱབ་ཆེན་པོ་བྱུང་མེད། མིག་སྔའི་ལྟ་ཞིབ་ཚད་ལེན་དང་དོ་དམ་མ་ལག་འོག ཉི་ཕཱ་ནད་དུག་རང་རྒྱལ་དང་ཐ་ན་འཛམ་གླིང་དུ་རེས་བསྐོར་གསར་པའི་འགོས་ཁྱབ་ཆེན་པོ་ཡོང་བའི་ཉེན་ཁ་ཆེན་པོ་མེད་ཅེས་དབྱེ་ཞིབ་བྱས་ནས་བརྗོད་ཡོད།  

ཉི་ཕཱ་ནད་དུག་ནི་མི་ཕྱུགས་གཉིས་ཀར་འགོ་བའི་ནད་ཅིག་ཡིན་པ་དང་།  སྲོག་ཆགས་མང་པོར་འགོས་ཐུབ་ཅིང་།  མི་རྣམས་ལ་ནད་གཞི་ལྗིད་མོ་ཕོག་པ་དང་ཚེ་སྲོག་ཤོར་བའི་གནས་ཚུལ་ཐོན་གྱ་ཡོད། དེ་ནི་ནད་དུག་འགོས་པའི་མི་དང་ཕ་ཝང་།  ཕག་པ་སོགས་བརྒྱུད་ནས་འགོས་ཁྱབ་འགྲོ་གི་ཡོད། འཛམ་གླིང་འཕྲོད་བསྟེན་རྩ་འཛུགས་ཀྱི་གྲངས་གཞི་ལས་མངོན་པར་ཉི་ཕཱ་ནད་དུག་འགོས་ན་ཤི་ཚད་40%-70%ཟིན་གྱི་ཡོད། 

འདས་པའི་ལོ་ངོ་ལྔ་ཡི་རིང་ལ།  རྒྱ་གར་དུ་ཉི་ཕཱ་རིམས་ནད་ཐེངས་གསུམ་ཐོན་པ་དང་།  ཟླ་འདིར་རྒྱ་གར་ལྷོ་རྒྱུད་དུ་རིམས་ནད་ཐེངས་བཞི་པ་དེ་ཐོན་ཡོད།   སྤྱི་ཟླ་9ཚེས་14ཉིན་བར།  མི་གཉིས་ཚེ་ལས་འདས།  ནད་ཡམས་འགོས་ཁྱབ་འགྲོ་བ་འགོག་ཆེད་རྒྱ་གར་ལྷོ་རྒྱུད་ཁ་ལ་ལ་མངའ་སྡེ་ཡིས་གཟའ་འཁོར་གོང་མའི་གཟའ་ལྷག་པ་ཉིན་་སློབ་གྲྭ་ཁག་ཅིག་དང་གཞུང་ལས་ཁང་།  སྤྱི་སྤྱོད་འགྲིམ་འགྲུལ་སོགས་འཁོར་སྐྱོད་བྱེད་མཚམས་བཞག་པ་ཁྱབ་བསྒྲགས་བྱས་པ་མ་ཟད། ལྟ་ཞིབ་ཚད་ལེན་བྱེད་འགོ་ཚུགས་ཡོད། 

ཡོངས་སྒྲོག་ཆ་འཕྲིན་ལས་མངོན་པར། མ་ལེ་ཞི་ཡ་དང་བྷང་ག་ལ། སིང་ཀ་ཕོར།  རྒྱ་གར་སོགས་སུ་ཉི་ཕཱ་ནད་དུག་འགོས་པའི་ནད་པ་ཐོན་ཡོད།