གསེར་གོང་བསྟུད་མར་འཕར་ནས་སྤྱི་རྒྱ་གཅིག་གི་རིན་གོང་སྒོར་ཁྲི47ལ་སླེབས་འདུག

གསེར་བསྡུའི་ལས་ལ་ཞུགས་ནས་ལོ་ངོ་བཅུ་ལྷག་ཕྱིན་པའི་ལས་རིགས་དེ་གའི་མི་སྣ་ཞིག་གིས། ཟླ་གོང་མར་སྒོར་ཁྲི44བཏང་ནས་གསེར་སྤྱི་རྒྱ1ཕྱིར་བསྡུས་པ་ཡིན་ཟེར། 

ཉེ་ལམ། རྒྱལ་ནང་གི་སིལ་ཚོང་གསེར་གོང་བསྟུད་མར་འཕར་ནས་གསེར་ཁེ་གང་ལ་སྒོར600ལ་སླེབས་པ་དང་། གསེར་གོང་སྐོར་གྱི་གླེང་གཞི་འཁྲུག་ཆ་དོད་པོ་བྱུང་ཡོད། གསེར་ཉོ་མཁན་ཇེ་མང་དུ་ཕྱིན་པ་དང་ཆབས་གཅིག་གསེར་ཚོང་མཁན་ཡང་ཇེ་མང་དུ་ཕྱིན་ཡོད། གསེར་བདག་མང་པོས་གསེར་གོང་མཐོ་གནས་སུ་ཡོད་སྐབས་གསེར་ཚོང་གི་ཡོད་པའི་སྐོར་ལ་གསར་འགོད་པས་རྒྱལ་ཡོངས་གསེར་དང་ནོར་རིགས་ཚོང་འདུས་ཧྲེན་ཀྲེན་ཧྲུའེ་པཱ་རྒྱལ་སྤྱིའི་ནོར་རིགས་ཉོ་ཚོང་ལྟེ་གནས་སུ་བཅར་འདྲི་བྱས་པ་རེད།

གསེར་མང་པོ་ཕྱིར་བསྡུ་བཞིན་ཡོད། རིན་གོང་ནང་མོལ་བྱས་ཆོག   ཧྲེན་ཀྲེན་ཧྲུའེ་པཱ་རྒྱལ་སྤྱིའི་ནོར་རིགས་ཉོ་ཚོང་ལྟེ་གནས་ཀྱི་གསེར་བསྡུའི་ཚོང་པ་ཞིག་གིས་ཟླ་ཕྱེད་རིང་གསེར་གོང་སྒོར460བར་འཕར་བ་དང་། གཟའ་འཁོར་གོང་མའི་ཆེས་མཐོ་དུས་ཉིན་ཕྱེད་ཙམ་ལ་གསེར་ཁེ་གང་ལ་སྒོར479རུ་སླེབས་ཡོད་ཚུལ་བཤད་ལ། ཟླ་གོང་མར་རིན་གོང་ཁེ་གང་ལ་སྒོར440ཟིན་ནས་གསེར་སྤྱི་རྒྱ1བསྡུས་པར་སྒོར་ཁྲི44སྤྲད་པ་ཡིན་ཞེས་ཟེར།

ཧང་ཀྲོའུ་གྲོང་ཁྱེར་ལིན་ཕིང་ཆུས་ནས་ཡིན་པའི་གསེར་བསྡུ་མཁན་ཞིག་གིས་གསར་འགོད་པར། ཉེ་ལམ་ལིན་ཕིང་ནས་ཡིན་པའི་མི་ཞིག་གིས་གསེར་ཁེ600ལ་སྒོར་ཁྲི33གྱི་རིན་གོང་གིས་བཙོང་བྱུང་ཟེར།

གསེར་ཕྱིར་བསྡུའི་ལས་སྒོ་སྒྲུབ་མཁན་ཞའོ་ཆིང་གིས། མི་དེས་གསེར་ལྕུག6བཏོན་བྱུང་། གསེར་ལྕུག་རེའི་ཆེ་ཆུང་འགྲིག་ཤོ་ལྟ་བུ་རེད་འདུག་ཟེར། ཁོ་མོས་གསེར་ལྕུག་དེ་རྣམས་རྒྱ་མར་བཅལ་བ་ན་ཁྱོན་ཁེ839.18ཟིན་པ་དེ་རྒྱ་མ་གཉིས་ཙམ་ཟིན་ཡོད་པ་རེད།